Dende hai máis de 15
anos, o último mércores do mes de abril celébrase o Día Internacional de
Concienciación sobre o Ruído, co propósito de promover o coidado do ambiente
acústico, a conservación da audición e a concienciación sobre as molestias e
danos que xeran os ruídos.
Xa non podemos aceptar que o ruído sexa un produto "natural" do desenvolvemento tecnolóxico, e en consecuencia débese regular e controlar.
O ruído, como outros axentes contaminantes, produce efectos negativos no ser humano, tanto fisiolóxicos coma psicosomáticos, e constitúe un grave problema ambiental e social. A loita contra o ruído é unha acción individual e colectiva. O ruído non o fan só os demais, senón que o facemos todos.
A loita contra o ruído precisa, polo tanto, da concienciación e colaboración cidadás, así como dunha implicación decidida e eficaz das administracións competentes, cunha lexislación e normativas axeitadas.
O obxectivo da celebración deste día é alertar aos cidadáns dos perigos que causa o ruído, como por exemplo trastornos físicos, perdida de audición ou desequilibrios psicolóxicos, e á vez dar a coñecer as diferentes formas de reducilo.
Este día celebrouse por
primeira vez o 24 de Abril de 1996, como parte dunha conferencia local
organizada pola "Liga de Persoas con Problemas Auditivos" da Cidade
de Nova York, é parte das actividades dun programa internacional no que
participan cidades dos Estados Unidos, Canadá, Europa e Asia, co fin de alertar
os cidadáns dos perigos do ruído e as formas de reducilo no ambiente
circundante.
A "contaminación
acústica" é un fenómeno que vai en aumento e é un problema importante,
sobre todo nas cidades con alto nivel de industrialización ou densamente
poboadas. A causa principal é a actividade humana: o transporte, a industria, a
construción de edificios e as obras públicas.
Por iso, o ruído é
considerado como un dos contaminantes máis agresivos. É un elemento
distorsionador que invade o ambiente que nos circunda producindo unha
deterioración na calidade de vida. Tamén é causa importante de trastornos
físicos (perdas de audición) e desequilibrios psicolóxicos.
A Sociedade Española de
Acústica invita este día a todos os centros escolares a desenvolver actos que
axuden a crear unha mentalidade respectuosa co medio acústico, e propón
"60 segundos de Silencio", ás 12 horas, para que cada un poida
percibir o ambiente sonoro que o rodea.
FALADE BAIXIÑO!!!!
Ningún comentario:
Publicar un comentario