LUSCOFUSCO: 12/12/12

Centenario

nacemento

Celso Emilio ferreiro

Dende o ENDL do CEIP Isaac Díaz Pardo querémonos sumar á iniciativa que, ao cumprirse o centenario do nacemento do poeta celanovés Celso Emilio Ferreiro, propoñen desde a Coordinadora Galega de Equipos de Normalización e Dinamización Lingüística (CGENDL) .

http://coordinadoraendl.org/recitandocelsoemilio/celso.php

Deixámosvos unha pequena mostra da súa obra:

Deitado frente ao mar...

Celso Emilio Ferreiro

Lingoa proletaria do meu pobo
eu fáloa porque sí, porque me gosta,
porque me peta e quero e dame a gaña
porque me sai de dentro, alá do fondo
dunha tristura aceda que me abrangue
ao ver tantos patufos desleigados,
pequenos mequetrefes sin raíces
que ao pór a garabata xa nan saben
afirmarse no amor dos devanceiros,
falar a fala nai,
a fala dos abós que temos mortos,
e ser, co rostro erguido,
mariñeiros, labregos do lingoaxe,
remo i arado, proa e rella sempre.

Eu fáloa porque sí, porque me gosta
e quero estar cos meus, coa xente miña,
perto dos homes bos que sofren longo
unha historia contada noutra lingoa.

Non falo pra os soberbios,
non falo pra os ruís e poderosos,
non falo pra os finchados,
non falo pra os valeiros,
non falo pra os estúpidos,
que falo pra os que agoantan rexamente
mentiras e inxusticias de cotío;
pra os que súan e choran
un pranto cotidián de volvoretas,
de lume e vento sobre os ollos núos.
Eu non podo arredar as miñas verbas
de tódolos que sofren neste mundo.
E ti vives no mundo, terra miña,
berce da miña estirpe,
Galicia, doce mágoa das Españas,
deitada rente ao mar, ise camiño...